Indoneziýanyň häkimiýetleri 46 döwletden daşary ýurtly syýahatçylar üçin elektron wizany resmileşdirmek boýunça onlaýn hyzmaty işe girizdi. Bu barada Antara agentligi habar berýär diýip, interfax.ru belleýär.
“Indoneziýanyň Kada-kanunlar we adam hukuklary ministrligi ýurda gelýän daşary ýurtly syýahatçylar üçin immigrasiýa hyzmatlaryny ýönekeýleşdirmek maksady bilen molina.imigrasi.go.id saýtynda e-VoA wizasyny almak üçin resmi taýdan elektron serwisi işe girizdi. Şeýle-de, kämilleşdirilen ulgamyň netijesinde syýahatçylara indi wizany tölemek üçin nobata durmak gerek däl” – diýip, neşir ýazýar.
Täze hyzmat Awstraliýa, Awstriýa, Argentina, Braziliýa, Belgiýa, Kanada, Hytaý, Çehiýa, Daniýa, Müsür, Finlýandiýa, Fransiýa, Germaniýa, Gresiýa, Wengriýa, Hindistan, Irlandiýa, Italiýa, Ýaponiýa, Litwa, Malaýziýa, Meksika, Marokko, Norwegiýa, Portugaliýa, Russiýa, Türkiýe ýaly 46 döwletden pasport eýeleri üçin elýeterlidir.
“Wiza almak üçin daşary ýurtly raýatlar saýtda akkaunt döredip, wiza almak üçin arzasyny hasaba almaly. Mundan başga-da, olar Visa, Mastercard ýa-da JCB logotipli kredit ýa-da debet kartynyň kömegi bilen hyzmat üçin onlaýn görnüşde göni töleg töläp bilerler. Töleg girizilenden soň e-VoA üçin maglumatlar barlanar. Arza tassyklanan halatynda elektron wiza arza berijiniň akkauntynda peýda bolar” – diýip, Antara ýazýar.
Mundan başga-da, arza beriji smartfona tassyklanan wizany ýükläp alyp, ony Indoneziýa gelende barlag-geçiriş nokadynda görkezip biler.
