7-nji noýabrda Özbegistanyň we Hytaýyň alymlary koronawirusyň täze ştammlaryna garşy waksinalaryň ikinji nesliniň kliniki synaglaryna girişdiler. Işläp taýýarlaýjylaryň maglumatlaryna görä, ol omikronyň häzirki ýaýran görnüşlerini öz içine alyp, has giň we güýçli immun jogabyny ýüze çykarýar. Bu barada Özbegistanyň Innowasion ösüş ministrligine salgylanyp, gazeta.uz habar berýär.
“Biz Etika boýunça komitetden Özbegistanda waksinalaryň ikinji nesliniň synaglaryna başlamak üçin rugsat aldyk. Bu ugurda Özbegistan bilen Hytaýyň hyzmatdaşlygynyň üstünlikli tamamlanyp, Özbegistan we beýleki ýurtlar üçin täze mümkinçilikleri açjakdygyna ynanýarys” diýip, ýurduň innowasion ösüş ministri Ibrohim Abdurahmonow aýdýar.
Hytaý akademigi Gao Fu, öz gezeginde, Özbegistan bilen Hytaýyň bilelikdäki tagallalary esasynda koronawirusa garşy “ZF200” ýa-da “ZF-UZ-VAC-2001” waksinasynyň birinji nesliniň işlenip taýýarlanylandygyny belledi.
Koronawirusa garşy waksinalaryň täze ikinji nesli “omikron-delta” waksinasynyň ikiwalentli belokly birleşmesini özünde jemleýär.
