Ženewada geçirilen Bütindünýä saglygy goraýyş assambleýasynyň 78-nji sessiýasynda BSGG-niň pandemiýalar bilen göreşmek boýunça şertnamasy kabul edildi. Bu resminama babatynda maslahatlar COVID-19 pandemiýasynyň güýjän döwründe başlap, üç ýyl dowam etdi.
Şertnama dünýäniň 124 ýurdy tarapyndan goldanyldy. Hiç kim garşy çykmady. Ýene 11 ýurt, şol sanda Russiýa, Ysraýyl, Slowakiýa, Eýran, Polşa we Italiýa saklandy.
Resminama geljekki pandemiýalaryň öňüni almakda we olara jogap bermekde deňsizligi aradan aýyrmaga gönükdirilýär. Onda derman serişdelerini, sanjymlary we lukmançylyk serişdelerini bilelikde işläp taýýarlamak barada aýdylýar.
Bütindünýä saglygy goraýyş guramasy şertnamanyň döwletleriň, halkara guramalarynyň, işewürligiň, raýat jemgyýetiniň we beýleki gatnaşyjylaryň arasynda hyzmatdaşlygy berkitmäge gönükdirilendigini belledi.
“Şeýle etmek bilen dünýä ýurtlarynyň hökümetleri adalatlylyk ýörelgelerini tassyklamaga, saglygy berkitmäge we öz ýurtlarynyň, şeýle-de tutuş dünýä jemgyýetiniň pandemiýa bolup biljek patogenleriň we wiruslaryň ýaýramagy bilen bagly howplardan goragyna ýardam eder” – diýip, BSGG-niň başlygy Tedros Adhanom Gebreýesus belledi.
Indi ýurtlara patogenlere elýeterliligi üpjün etmek hem-de sanjymlar, testler we bejergiler bilen paýlaşmak ulgamyny (PABS) ylalaşmak gerek. Öndürijiler çykarýan sanjymlarynyň, derman serişdeleriniň we beýlekileriň 20%-ine çenli BSGG-e bermeli bolar we ol hem saglyk üçin abanýan howpa we saglygy goraýyş ulgamynyň zerurlyklaryna baglylykda ýaýradylar.
Şertnamanyň güýje girmegi üçin ony azyndan 60 ýurt tassyklamaly. Reuters bu prosesiň iki ýyla çekip biljekdigini belleýär. Ilkibaşda ýurtlar PABS mehanizmi barada ylalaşmaly.
