Hytaýyň Gonkong uniwersitetiniň barlagçylary D3S-001 dermanynyň kliniki synaglarynyň birinji tapgyryny tamamladylar. Derman ownuk däl öýjükli öýken, kolorektal we KRAS-G12C mutasiýaly aşgazan asty mäziniň çişlerini (rak keseli) bejermek üçin niýetlenendir diýip, South China Morning Post habar berýär.
Derman ingibitorlaryň täze nesline degişlidir we KRAS-G12C mutant belogynyň işini bökdeýär. Doktor Gerbert Lunganyň sözlerine görä, D3S-001 öňki dermanlara garanyňda has çalt täsir edýär we täsiri uzak saklanýar. Laboratoriýa şertlerinde we näsaglarda geçirilen synaglaryň dowamynda mutasiýanyň işjeňliginiň çalt we durnukly basylmagy hasaba alyndy.
Bu barlaga 62 adam gatnaşdy. Öň beýle ingibitorlary almadyk 42 hassanyň 70%-de çişler kiçeldi ýa-da ýitip gitdi. Olaryň 97%-den gowragy ýagdaýynyň durnuklaşandygyny habar berdi. Öň beýleki dermanlar bilen bejergi alan näsaglaryň 30%-de gowulaşma göründi we 80%-de kesel beterleşmändir.
Barlagçylaryň berýän maglumatlaryna görä, ters täsirleri esasan ýeňil ýa-da aram boldy.
Derman Hytaýyň D3Bio kompaniýasy bilen bilelikde işlenip taýýarlanýar. Ikinji tapgyryň çäklerinde gatnaşyjylaryň sanyny 80-100 adama ýetirmek meýilleşdirilýär. Üçünji tapgyrda alymlar D3S-001-i öňki ingibitorlar bilen deňeşdirerler.
Bu derman KRAS-G12C mutasiýa bilen baglanyşykly bejermesi kyn çişleri bolan näsaglary bejermegiň usullaryny giňeldip biler.
