Bütindünýä Meteorologiýa guramasy (BMG) soňky sekiz ýyly meteorologiki gözegçilikleriň başlan wagtyndan bäri iň yssy ýyllar diýip ykrar etdi. Bu barada BMG-niň bu gurluşynyň hasabatyna salgylanyp, “Guardian” habar berýär. Muny interfax.ru ýetirýär.
BMG-niň hasabatynda 2022-nji ýylda ortaça global temperaturanyň industrialdan öňki döwre (1850-1900) garanyňda, Selsiý boýunça 1,15 gradus ýokary boljakdygy bellenilýär.
Bu 2016-njy ýyldan bäri her ýyl rekord derejede yssy bolandygyny aňladýar. Şunuň netijesinde, global ýylamanyň derejesini Selsiý boýunça 1,5 gradus bilen çäklendirmek baradaky umumy global maksada ýetmek hem şübheli bolup galýar.
BMG-niň hünärmenleri atmosfera bug gazlarynyň zyňylmagynyň dünýä ummanynyň derejesiniň ýokarlanmagyna we buzlaryň eremegine getirendigini, netijede dünýäniň dürli ýerlerinde – Pakistandan Puerto-Riko çenli adatdan daşary howanyň hasaba alnandygyny, Grenlandiýada bolsa deňiz derejesinden 3,2 müň metr belentlikde ilkinji gezek ýagşyň ýagandygyny bellediler.
Bütindünýä Meteorologiýa guramasynyň hasabatynyň neşir edilmegi ýekşenbe güni Şarm eş-Şeýhde (Müsür) açylan BMG-niň howanyň üýtgemegi boýunça konferensiýasyna gabat getirildi.
