Özbegistan Respublikasynyň paýtagty Daşkentde ýerleşýän Türkmen medeni merkeziniň döredilmegine 20 ýyl boldy. Şu mynasybetli guralan çärelere gatnaşmak maksady bilen, ÝUNESKO-nyň işleri barada Türkmenistanyň milli toparynyň jogapkär sekretary Çynar Rustemowanyň ýolbaşçylygyndaky türkmen wekiliýeti dostlukly ýurtda saparda boldy.
Wekiliýetiň agzalary Daşkent Döwlet özbek dili we edebiýaty uniwersitetinde «Özbek we türkmen halklarynyň dostlugyny berkitmekde Magtymgulynyň döredijiliginiň orny» ady bilen geçirilen halkara ylmy-amaly maslahata gatnaşdylar. Onuň dowamynda Özbegistanyň Daşary ýurtlar bilen milletara gatnaşyklar we dostlukly aragatnaşyklar boýunça komitetiniň başlygynyň orunbasary, Türkmenistanyň Özbegistan Respublikasyndaky Adatdan daşary we Doly ygtyýarly ilçisi, şeýle-de ÝUNESKO-nyň işleri barada Türkmenistanyň milli toparynyň jogapkär sekretary gutlag sözleri bilen çykyş etdiler.
Agzalan komitetiň wekilleri bilen geçirilen duşuşykda bu düzümiň alyp barýan işi hakynda gürrüň berildi. Nygtalyşy ýaly, Özbegistanda türkmen dilinde okadylýan mekdepleriň 44-si bolup, şolaryň 15-sinde okuwlar hem türkmen, hem özbek dillerinde alnyp barylýar. Garagalpagystan Respublikasynyň Nukus Döwlet uniwersitetinde türkmen filologiýasy fakulteti döredildi, Ajiniýaz adyndaky Nukus mugallymçylyk institutynda bolsa türkmen dili boýunça başlangyç synp mugallymlaryny taýýarlamak fakulteti açyldy.
Şeýle-de ýurdumyzyň wekiliýetiniň agzalary Türkmen medeni merkeziniň döredilmeginiň 20 ýyllygy mynasybetli «Türkestan» sungat köşgünde guralan konserte gatnaşdylar.
