Hindistanyň paýtagtynda soňky birnäçe günüň dowamynda hasaba alnan howanyň hiliniň ýaramazlaşmagy bilen göreşmek üçin birnäçe çäreler geçirildi. Bu barada Deli hökümetiniň wekili habar berdi diýip, Sinhua agentligi belleýär. Muny forbes.kz ýetirýär.
Aýratynam, Delide we oňa golaý sebitlerde, esasanam, howanyň hapalanma derejesi howply bolan ýerlerde binalary gurmak we ýykmak boýunça işlere gadaganlyk girizildi, şeýle-de suw pürküjiler we tüsselere garşy ýaraglar işe girizildi.
30-njy oktýabra çenli ýagdaýa görä, PM 2,5 bölejikleriniň konsentrasiýasy nukdaýnazaryndan howanyň hiliniň umumy indeksi Delide 331 bolup, bu howanyň hiliniň “örän ýaramazdygyny” görkezýär. Delä golaý Noida şäherinde howanyň hiliniň indeksi 379-a, Delidäki Mathura-roudda 354-e barabar. Bu görkezijiler howanyň “örän ýaramaz” hili kategoriýasyna degişlidir.
Deli okrugynyň Daşky gurşaw ministri Gopal Raý tozan mukdarynyň birbada ýokarlanmagynyň, ulag serişdeleriniň gazlary bilen daşky gurşawyň hapalanmagynyň, şeýle-de biomassanyň ýakylmagynyň şäherde howanyň hiliniň ýaramazlaşmagyna getirýändigini aýtdy.
Ministr Delide ýüze çykýan ýagdaýa jogap hökmünde binalary gurmak we ýykmak boýunça işleriň gadagan edilendigini aýtdy. Ol gadaganlygyň berjaý edilişine gözegçilik etmek üçin 586 toparyň döredilendigini sözüniň üstüne goşdy.
Mundan başga-da, Delide howanyň hapalanmagyna garşy göreşmek üçin 521 suw pürküji, 233 tüssä garşy ýarag we 150 mobil tüssä garşy gurluş ulanylýar.
