Hindistanyň premýer-ministri Narendra Modi ýurduň häzirki taryhyndaky ähli hökümet baştutanlarynyň arasynda bu wezipäni üznüksiz we iň uzak wagtlap eýelän premýer-ministr hökmünde rekord goýdy.
10-njy iýunda Modiniň premýer-ministr hökmünde ilkinji gezek kasam içen gününden bäri 4 399 gün geçdi. Ol ilkinji gezek 2014-nji ýylyň 26-njy maýynda wezipä girişipdi. Şeýlelikde, Modi garaşsyz Hindistanyň ilkinji premýer-ministri Jawaharlal Nerunyň görkezijisinden geçdi. Neru bu wezipede yzygiderli 4 398 günläp — 1952-nji ýylyň 13-nji maýyndan (Hindistanda ilkinji ähumumy saýlawlardan soň kasam içen güni) tä 1964-nji ýylyň 27-nji maýynda aradan çykýança galypdy. Onuň bu rekordy altmyş ýyldan gowrak wagtlap saklandy.
Şeýle hem Modi 2025-nji ýylyň 25-nji iýulynda premýer-ministr wezipesinde iň uzak wagtlap we üznüksiz galmak boýunça Indira Gandiniň rekordyny hem täzeläpdi. Gandi 1966-njy ýylyň 24-nji ýanwaryndan tä 1977-nji ýylyň 24-nji martyna çenli — jemi 4 077 günläp wezipäni üznüksiz eýeläpdi. Mundan başga-da, Modi hökümetiň başynda duran wagty parlament saýlawlarynda yzygiderli üç gezek ýeniş gazanan Nerudan soňky ilkinji lider boldy.
«Hindustan Times» gazetiniň bellemegine görä, bu rekord Hindistanda düýpli özgerişlikleriň bolýan döwründe ýüze çykdy. Neru garaşsyzlygyň ilkinji ýyllarynda ýurda ýolbaşçylyk edýän wagty Hindistanyň ilaty, takmynan, 340 million adam töweregi bolan bolsa, 2014-nji ýylda Modi wezipä gelende ilat sany 1,31 milliarddan geçdi we şondan bäri artyp, 1,46 milliarddan gowrak boldy.
