Apple kompaniýasy dördünji maliýe çärýeginde arassa girdejisini 0,8% ýokarlandyrdy – bu çaklanylandan gowy bolsa-da, iPhone satuwy garaşylan netijäni bermedi diýip, interfax.ru belleýär.
Kompaniýanyň metbugat relizinde habar berlişi ýaly, 24-nji sentýabrda tamamlanan çärýegiň jemi boýunça arassa girdeji geçen ýylyň degişli çärýeginde alnan 20,551 mlrd dollar ýa-da paý üçin 1,24 dollar bilen deňeşdirilende, 20,721 mlrd dollar ýa-da paý üçin 1,29 dollar boldy. Girdeji sekiz göterim ýokarlanyp, bir ýyl ozalky 83,4 mlrd dollardan 90,1 mlrd dollara ýetdi.
Geçen çärýek iPhone satuwyndan gazanylan girdeji geçen ýylky 38,9 mlrd dollara garşy 42,6 mlrd dollar boldy. Mac kompýuterleriniň satuwyndan alnan girdeji 9,2 mlrd dollardan 11,5 mlrd dollara çenli, dakylýan gurluşlaryň we aksessuarlaryň satuwyndan alnan girdeji 8,8 mlrd dollardan 9,7 mlrd dollara çenli ýokarlandy. iPad satuwyndan alnan girdeji bolsa 8,3 mlrd dollardan 7,2 mlrd dollara çenli azaldy.
App Store, Apple Music, Apple Pay we iCloud serwislerinden gelýän girdeji bir ýyl ozalky 18,3 mlrd dollar bilen deňeşdirilende, 19,2 mlrd dollara çenli ýokarlandy. Ýylyň başyndan bäri kompaniýanyň kapitallaşdyrmasy 18,5%, 2,4 trln dollara çenli peseldi.
