Energetika ministrliginiň “Türkmenenergo” döwlet elektroenergetika korporasiýasy Özbegistan Respublikasynyň “Özbegistanyň milli elektrik ulgamlary” paýdarlar jemgyýeti bilen baglaşylan şertnama goşmaça Ylalaşygy baglaşar. Bu baradaky degişli Kararyň taslamasyny 28-nji oktýabrda geçirilen Hökümet mejlisinde wise-premýer Ç.Purçekow döwlet Baştutanynyň garamagyna hödürledi.
Prezident Serdar Berdimuhamedow ýurdumyzyň energiýa ulgamynyň kuwwatlyklaryny yzygiderli artdyrmak boýunça işleriň wajypdygyny nygtady. Energiýa ulgamy diňe bir Diýarymyzyň çäginde elektrik energiýasynyň ygtybarly we durnukly iberilmegini üpjün etmek bilen çäklenmän, eýsem, onuň daşary ýurtlara iberilýän möçberini artdyrmaga hem ýardam etmelidir. Döwlet Baştutany hödürlenen Karara gol çekip, ony wise-premýere sanly ulgam arkaly iberdi hem-de resminamanyň ýerine ýetirilişine berk gözegçiligi üpjün etmegi tabşyrdy.
