Ahal welaýatynyň täze, döwrebap edara ediş merkezinde «Organiki bakjalyk we onuň ekologiýa goşýan goşandy» ady bilen 500 hünärmene niýetlenen okuw maslahatyny geçirmek meýilleşdirilýär. Halk Maslahatynyň Başlygy Gurbanguly Berdimuhamedow Bütindünýä rekordlary guramak boýunça geňeşçi Aýdyň Türkgüji bilen duşuşygynyň barşynda maslahatyň guramaçylyk derejesini maslahatlaşdy.
Aýdyň Türkgüji Ahal welaýatynyň täze merkezinde «Organiki bakjalyk we onuň ekologiýa goşýan goşandy» ady bilen geçiriljek okuw maslahatynyň guramaçylyk meseleleri we bu okuw maslahatynyň esasy maksady hem-de onuň öňünde durýan wezipeler barada gürrüň berdi. Bu künjegiň özboluşly tebigy aýratynlygy we täze merkeziň töwerekleriniň ekerançylyk, bagçylyk bilen gurşalyp alynmagy onuň ýokary ekologiýa ýagdaýyndan habar berýär. Şu nukdaýnazardan 500 hünärmene niýetlenen okuw maslahatyny guramak üçin şu ýeriniň seçilip alynmagy tötänden däldir.
Gurbanguly Berdimuhamedow häzirki döwürde örän möhüm bolup durýan «Organiki bakjalyk we onuň ekologiýa goşýan goşandy» atly okuw sapagynyň dünýä tejribesinde deňi-taýy bolmadyk durmuş-bilim çäresine öwrüljekdigini belledi we onuň ýokary guramaçylyk derejesinde geçiriljekdigine ynam bildirdi.
Aýdyň Türkgüji türkmen topragynda guralýan giň möçberli okuw maslahatyny guramagy we oňa gatnaşmagy özi üçin uly hormat saýandygyny belläp, bu çäräniň ýokary guramaçylyk derejesiniň üpjün edilmegi ugrunda edilýän tagalla üçin hoşallyk bildirdi.
