27-nji oktýabrda Türkmenistanyň Milli Geňeşiniň Halk Maslahatynyň Başlygy Bütindünýä rekordlary guramak boýunça geňeşçi Aýdyň Türkgüji bilen duşuşdy. Duşuşyk Gurbanguly Berdimuhamedowyň Ahal welaýatyna amala aşyran nobatdaky iş saparynyň çäklerinde geçirildi. Onuň barşynda bu ýerde 500 hünärmene niýetlenen okuw maslahatynyň guramaçylyk derejesi bilen baglanyşykly meseleler ara alnyp maslahatlaşyldy.
Aýdyň Türkgüji Ahal welaýatynyň täze merkezinde «Organiki bakjalyk we onuň ekologiýa goşýan goşandy» ady bilen geçiriljek okuw maslahatynyň guramaçylyk meseleleri we bu okuw maslahatynyň esasy maksady hem-de onuň öňünde durýan wezipeler barada gürrüň berdi. Bu künjegiň özboluşly tebigy aýratynlygy we täze merkeziň töwerekleriniň ekerançylyk, bagçylyk bilen gurşalyp alynmagy onuň ýokary ekologiýa ýagdaýyndan habar berýär. Şu nukdaýnazardan 500 hünärmene niýetlenen okuw maslahatyny guramak üçin şu ýeriniň seçilip alynmagy tötänden däldir.
Duşuşygyň dowamynda Gurbanguly Berdimuhamedow Ahal welaýatynyň täze merkeziniň ýerleşýän ýeriniň ahalteke bedewleriniň ilki dörän ýeridigini, munuň üçin bolsa ýakymly dag howasy bilen şypaly çeşmelerden gözbaş alan Altyýap hem-de Sekizýap akabalarynyň oňyn täsiriniň bolandygyny belledi. Bellenilişi ýaly, häzirki döwürde Ahal welaýatynyň täze merkeziniň gündogar hem-de günbatar ýakalarynyň bag-bakjaçylyga beslenmeginiň bu ýerde ýakymly howa gurşawynyň emele gelmegini şertlendirýär.
Halk Maslahatynyň Başlygy häzirki döwürde örän möhüm bolup durýan «Organiki bakjalyk we onuň ekologiýa goşýan goşandy» atly okuw sapagynyň dünýä tejribesinde deňi-taýy bolmadyk durmuş-bilim çäresine öwrüljekdigini belledi we onuň ýokary guramaçylyk derejesinde geçiriljekdigine ynam bildirdi.
