ABŞ-dan we Türkmenistandan telekeçiler özara bähbitli hyzmatdaşlygy berkitmäge gyzyklanma bildirýärler. Bu barada Trend-e “Türkmenistan-ABŞ” işewürlik geňeşiniň ýerine ýetiriji müdiri Erik Stýuart aýtdy.
“Amerikan-türkmen gatnaşyklary diýseň oňyn bolup, özara bähbide gönükdirilendir. Türkmenistanda işewürligi ösdürmäge gyzyklanma bildirýän birnäçe amerikan kompaniýasy bar we, tersine, türkmen işewür toparlary hem amerikan önümlerine we tehnologiýalaryna ýokary baha berýär” – diýip, Stýuart belleýär.
Ol ABŞ-dan işewürleriň türkmen hyzmatdaşlaryny gözlemek bilen gyzyklanýandygyny hem belledi.
“Meniň pikirimçe, iki ýurduň arasyndaky gatnaşyklar geljekki hyzmatdaşlygyň esasyny düzýän ägirt uly potensiala eýe. Biz mundan beýläk hem gatnaşyklarymyzy ýokary derejede saklap, işewürlik üçin ähli mümkinçiliklerden peýdalanmagy dowam etdirmek isleýäris” – diýip, Erik Stýuart sözüniň üstüni ýetirdi.
