"Şu gün ýurdumyzda resmi saparda bolýan Özbegistan Respublikasynyň Prezidenti Şawkat Mirziýoýew günüň ikinji ýarymynda paýtagtymyzdaky «Halk hakydasy» ýadygärlikler toplumyna baryp, «Baky şöhrat» ýadygärligine gül dessesini goýdy" diýip, "Türkmenistan" gazeti ýazýar.
Nygtalyşy ýaly, paýtagtymyzyň günorta-günbatar künjeginde ýerleşýän we türkmen halkynyň edermen ogullaryna hormatyň hem-de milletiň beýik geçmişine goýulýan sarpanyň nyşany bolan «Halk hakydasy» ýadygärlikler toplumynda dostlukly döwletiň Baştutanyny Aşgabat şäheriniň häkimi garşylady.
Bu ýerde 1941 — 1945-nji ýyllaryň Beýik Watançylyk urşunda gahrymançylygyň, edermenligiň, gaýduwsyzlygyň nusgasyny görkezenleri hatyralaýan «Baky şöhrat» ýadygärligine gül desseleri goýuldy we deňsiz-taýsyz gahrymançylyga tagzym edildi.
Soňra belent mertebeli myhman «Watan mukaddesligi» muzeýine baryp gördi we Hormatly myhmanlar kitabynda ýadygärlik ýazgy galdyrdy.
