Hazar deňzi boýunça gämili syýahatçylyk gatnawlary taryhda ilkinji gezek 2023-nji ýylda başlanar diýip, penşenbe güni Rosturizmiň ýolbaşçysy Zarina Doguzowa habar berdi.
«Syýahatçylyk soňky ýyllarda sebitiň ähli ýurtlary üçin, ykdysadyýetiň däp bolan pudaklary bilen birlikde, möhüm sosial-ykdysady pudak hökmünde aýratyn ähmiýete eýe bolýar. Biziň esasan iki sany üstünde işlenilmeli trekimiz bar: birinjisi — bu logistika we ulag bilen bagly zatlaryň ählisi. Ikinjisi, hemmäniň tagallalaryny birleşdirmeli örän möhüm ugry — syýahatçylyk infrastrukturasyna degişli ähli zatlar» — diýip, ol Ikinji Hazar ykdysady formunyň çäklerinde geçirilen «tegelek stoluň» başynda çykyş edende aýtdy.
Rosturizmiň ýolbaşçysy Hazar deňzi boýunça kruizleriň üstünde aýratyn durup geçdi.
«Bu häzirlikçe iň bir doly işlenilmedik ugur bolsa gerek. Bu ýerde esasy özüne çekýän zat — kruiz flotynyň özi. Astrahanyň gämi ussahanalarynda «Pýotr Welikiý» kruiz laýneriniň gurulýandygyndan siz habarly. Biz ony ýylyň ahyryna çenli doly taýýar etmegi göz öňünde tutýas we 2023-nji ýyldan başlap Hazar deňziniň taryhynda ilkinji gezek kruiz gämi gatnawy ýola goýlar» — diýip, ol mälim etdi.
