Türkmenistanyň we Hytaýyň başlangyçlary, ilkinji nobatda, syýasatdan daşdaky ýönekeý adamlaryň millionlarçasy barada aladanyň netijesinde öňe sürlendir. Bu adamlara parahatçylyk, durnuklylyk, işlemek mümkinçiligi, asuda, parahat geljegiň kepillikleri zerur bolup durýar diýip, Milli Geňeşiň Halk Maslahatynyň Başlygy Gurbanguly Berdimuhamedow Hytaý Halk Respublikasynyň Türkmenistandaky ilçihanasynyň metbugat-attaşesiniň sowallaryna jogap bermeginiň barşynda belledi.
Gurbanguly Berdimuhamedowyň bellemegine görä, Türkmenistanyň başlangyjy we Hytaý Halk Respublikasynyň Başlygynyň başlangyçlary hakykatda umumy dünýägaraýyş we syýasy esasa eýedir. Olarda ähli ýurtlara, ýolbaşçylara häzirki dünýäniň ýagdaýlaryny anyk we jogapkärli seljermek, mundan beýläk-de çaknyşyklaryň dowam etdirilmeginiň we harby-syýasy bäsleşigiň nämelere getirip biljekdigi barada oýlanmaga, adamzadyň howply çäge ýetendigine, şondan aňyrda garaşylmadyk netijeler bilen bütindünýä howpsuzlygynyň tutuş gurluşynyň döwüljekdigine anyk göz ýetirmäge çagyryş beýan edilendir.
«Türkmenistan häzirki döwürde Hytaý bilen bilelikde bu düşünjeleriň halkara we sebit syýasatynyň kesgitleýji şertlerine öwrülmegi, bellenip geçilen howply çäkden yza çekilmek üçin şertleri döretmek we dawalary we gapma-garşylyklary parahatçylykly, syýasy-diplomatik ýollar bilen düzgünleşdirmek boýunça jogapkärli çözgütleri kabul etmek üçin mümkin bolan ähli tagallalary edýär. Bu tagallalar, elbetde, deňhukuklylyk kadalary we taraplaryň kanuny bähbitlerine hormat goýmak esasynda amala aşyrylmalydyr» - diýip, Gurbanguly Berdimuhamedow belledi.
