4-nji oktýabrda Türkmenistanyň Milli Geňeşiň Halk Maslahatynyň Başlygy Gurbanguly Berdimuhamedow Hytaýyň döwlet köpçülikleýin habar beriş serişdeleriniň haýyşy boýunça Hytaý Halk Respublikasynyň Türkmenistandaky ilçihanasynyň metbugat-attaşesi Wan Sziunyň sowallaryna jogap berdi.
Wan Sziu energetika, ulag we beýleki pudaklarda ikitaraplaýyn hyzmatdaşlygyň häzirki ýagdaýyna we mümkinçiliklerine Gurbanguly Berdimuhamedowyň nähili baha berýändigini sorady.
«Ýangyç-energetika pudagy Türkmenistanyň we Hytaý Halk Respublikasynyň hyzmatdaşlygynyň ileri tutulýan örän möhüm ugry bolup durýar.
Häzirki döwürde biz Hytaý Halk Respublikasynyň ykdysadyýetiniň barha artýan isleglerini we Türkmenistanyň serişde binýadynyň mümkinçiliklerini nazara alyp, türkmen tebigy gazyny ibermegiň möçberlerini artdyrmak bilen bagly meseleleriň üstünde işleýäris. Şunuň bilen baglylykda, Türkmenistandan Hytaýa turba geçirijiniň dördünji şahasyny gurmak mümkinçiliklerini jikme-jik ara alyp maslahatlaşmaga taýýardyrys» - diýip Gurbanguly Berdimuhamedow nygtady.«Iki tarap hem ulag ulgamynda hyzmatdaşlygy ösdürmäge uly ähmiýet berýär. Biz bu ugurda Hytaýa Aziýa-Ýuwaş ummany sebitinde örän möhüm hyzmatdaşymyz hökmünde garaýarys.
Türkmenistan häzir öz hyzmatdaşlary bilen bilelikde Gündogar–Günbatar we Demirgazyk–Günorta ugurlary boýunça utgaşdyrylan köp ugurly ulag-üstaşyr we logistika üpjünçilik ulgamlaryny döredýär. Geljekde bu ulgam Hazar deňzi, Gara deňiz, Baltika sebitlerine çykýan üstaşyr geçelgelerini öz içine alar. Bu Merkezi Aziýanyň çäkleriniň üsti bilen Aziýa-Ýuwaş ummany sebitinden Ýewropa we Ýakyn Gündogar bazarlaryna amatly guryýer ýoluny açýar.
Biziň tagallalarymyz hytaýly hyzmatdaşlarymyz bilen göz öňünde tutýan maksatlarymyza ýetmäge gönükdirilmelidir. Hususan-da, ulaglaryň ähli görnüşleri, şol sanda demir we awtomobil ýollary, howa gatnawlary, beýleki üpjünçilik ulgamlary arkaly Hytaýdan Türkmenistanyň üsti bilen Ýewropa, Ýakyn Gündogara gatnawlaryň mümkinçiliklerini doly açmaga niýetlenmelidir. Şeýle hem, bu ulgamlar esasy merkezlerde logistik terminallaryny öz içine almalydyr. Türkmenbaşy porty Hazar deňzinde şeýle merkezleriň birine öwrülip biler» - diýip, Halk Maslahatynyň Başlygy belledi.
