Türkmenistanda täze okuw ýylynda umumybilim berýän orta mekdepleriň birinji synpyna okuwa kabul edilýän okuwçylara noutbuk kompýuterleri sowgat bermek boýunça asylly däp dowam etdiriler. Degişli Karara anna güni geçirilen Hökümet mejlisiniň dowamynda ýurduň Prezidenti Serdar Berdimuhamedow gol çekdi.
Resminama laýyklykda, Bilim ministrligine «Agzybirlik tilsimaty» bilelikdäki kärhanasy we «Aýdyň gijeler» hojalyk jemgyýeti bilen Türkmenistanda öndürilýän noutbuklaryň degişli mukdaryny satyn almak, olary 2026-njy ýylyň 1-nji awgustyna çenli bilim edaralarynda gurnamak we olara tehniki hyzmat etmek barada şertnamalary baglaşmaga ygtyýar berildi.
Döwlet Baştutany wise-premýer B.Mämmedowa bu resminamanyň wagtynda ýerine ýetirilmegini üpjün etmegi tabşyrdy.
Mejlisde wise-premýer 2026-njy ýylyň ilkinji dört aýynda türkmen okuwçylarynyň we talyplarynyň halkara olimpiadalarynda üstünlikli çykyş edip, jemi 807 medal gazanandyklaryny habar berdi.
Döwlet Baştutany innowasion tehnologiýalardan baş çykarýan, giň dünýägaraýyşly ýaş nesli terbiýelemek boýunça alnyp barylýan işleriň döwlet syýasatynyň ileri tutulýan ugrudygyny nygtady. Birinji synp okuwçylary üçin noutbuklaryň satyn alynmagy we sowgat berilmegi bilim ulgamyny sanlylaşdyrmak hem-de bilim almakda deň mümkinçilikleri döretmek strategiýasynyň bir bölegidir.
