Ýaponiýanyň Okinawa prefekturasynda köp mekdepler okuwçylara maşgalasy bilen wagt geçirmekleri üçin ýylda birnäçe gün «okuw rugsadyny» almaga rugsat berýän maksatnamany ornaşdyryp başlady. Bu barada «The Japan Times» gazeti habar berýär.
Neşir tarapyndan ýakynda geçirilen pikir soraşmalaryň netijelerine görä, eýýäm 15 sany häkimlik mekdeplerde şeýle ulgamy girizdi. Bu maksatnama «öwrenmek» we «dynç alyş» sözleriniň birleşmeginden dörän «learncation» diýen ady aldy. Ulgamyň kömegi bilen okuwçylara mekdep žurnalynda «gelmedi» diýip ýazgy galdyrylmazdan, sapaklary sypdyrmaga resmi rugsat berilýär.
Şeýle ulgam ilkinji gezek 2023-nji ýylda Aýti prefekturasynda girizilipdi. Ol ýerde okuwçylar ýylda üç güne çenli dynç alyş günlerini alyp bilýär.
Taketomi şäherinde bolsa bu täze düzgün şu ýylyň aprel aýynda kabul edildi we rugsat berilýän günleriň sany bäşe çenli köpeldildi. Ýylyň ahyryna çenli bu maksatnamany jemi 41 sany häkimlikde ornaşdyrmak meýilleşdirilýär.
Gazetiň ýazmagyna görä, bu täzelik köp sanly ene-atalar üçin hakyky halasgär boldy. Mysal üçin, 38 ýaşly Tomona Miýahira gyşda maşgala dynç alşyny gurnamak üçin her ýyl şu ulgamdan peýdalanýar.
«Meniň ýoldaşym daýwing bilen meşgullanýar we adamlary kabul edýän myhman öýüni dolandyrýar. Şonuň üçin mekdeplerde resmi "Altyn hepde" dynç alyş günleri başlananda, biz adadan hiç ýere çykyp bilmeýäris. Hatda başlangyç mekdepde okaýan iki çagamyzyň tomusky dynç alyş günlerinde hem biziň işden rugsada çykmaga mümkinçiligimiz bolmaýar» – diýip, ene-atalaryň biri paýlaşýar.
