Tebigy gaz iň möhüm energiýa serişdeleriniň biri bolmagynda galýar, gaz çykarylyşy baradaky iň täze maglumatlar bolsa global bazaryň nähili jemlenendigini görkezýär.
ABŞ-nyň Energetika institutynyň "Statistical Review of World Energy" hasabatynyň geçen ýylky netijelerine esaslanýan infografika, energetikanyň, geosyýasatyň we klimat meselesiniň özara baglanyşygynda haýsy ýurtlaryň bazarda esasy orny eýeleýändigini görkezýär.
ABŞ uly aratapawut bilen birinji orny eýeleýär. 2024-nji ýylda bu ýurt 1,03 trillion kubmetrden gowrak gaz öndürdi. Ösüşi slanes ýataklary we döwrebap tehnologiýalar üpjün etdi. Bu bolsa ABŞ-a, esasan hem Russiýanyň üpjünçiligini çalşyrmak isleýän Ýewropa üçin suwuklandyrylan tebigy gazyň (STG) iň uly eksportçysy hökmündäki ornuny berkitmäge mümkinçilik berdi.
Russiýa takmynan 630 milliard kubmetr göwrüm bilen, Ýewropa eksportynyň azalmagyna garamazdan, öňdebaryjy oýunçylaryň biri bolmagynda galýar. Çeşme Russiýanyň öz üpjünçilik ugruny Aziýa tarap üýtgedýändigini we STG kuwwatlyklaryny giňeldýändigini belleýär.
Eýran we Hytaý degişlilikde takmynan 263 we 248 milliard kubmetr gaz çykarýarlar. Hytaýdaky ösüş ýurduň energetika garaşsyzlygy ugruna eýerýändigi bilen baglanyşyklydyr.
Ilkinji onluga, şeýle hem Kanada, Katar, Awstraliýa, Saud Arabystany, Norwegiýa we Alžir girýär. Katar we Awstraliýa STG bazarynda esasy orny eýeleýär, Norwegiýa Ýewropa turbalar arkaly gaz ugradýan esasy ýurda öwrüldi, Alžir bolsa kontinentiniň günorta ýurtlary üçin möhümdir.
Energetikanyň geljegi baradaky çekişmeleriň fonunda, gaz öňküsi ýaly senagat we elektroenergetika üçin "geçiş ýangyjy" hökmünde garalýar.
