Netflix kompaniýasy ilkinji hususy oýun studiýasyny işe girizmegiň üstünde işleýär. Öň, striming diňe işläp düzüjileriň üstünlikli taslamalaryny satyn alýardy. Bu barada kompaniýanyň wekilleri resmi saýtda habar berdiler diýip, forbes.ru belleýär.
Kompaniýanyň oýun studiýalary boýunça wise-prezidenti Amir Rahiminiň aýtmagyna görä, kompaniýanyň ilkinji hususy studiýasy Finlýandiýanyň Helsinki şäherinde ýerleşer. Studiýanyň müdiri öň EA we Zynga ýaly işläp düzüjilerde işlän Marko Lastikka bolar. Rahiminiň bellemegine görä, Netflix “mahabatsyz we programmalarda satyn almasyz köp sanly ajaýyp we özüne çekiji özboluşly oýunlary hödürlejek dünýä derejesindäki oýun studiýasyny döretmäge ymtylýar”.
Kompaniýanyň wekili Helsinkidäki studiýanyň ilkinji oýnunyň nähili boljakdygyny we onuň haýsy gurluşlar üçin niýetlenjekdigini habar bermedi.
Öň, CNBC her gün Netflix-iň mobil oýunlaryny strimingiň programmasynyň degişli bölüminde onlaýn kinoteatryň abunaçylarynyň umumy sanynyň azyndan 1%-iniň oýnaýandygyny habar berdi. Häzirki wagtda oýun bölüminde jemi 24 taslama hödürlenýär. Bu mukdara platformanyň seriallaryna esaslanýan oýunlar hem girýär. Platforma ony 2021-nji ýylyň noýabr aýynda işe girizdi. Oýunlar diňe abunaçylar üçin elýeterlidir, ýöne olary aýratyn programma hökmünde ýükläp almaly.
