Netflix platformasy «Kagyz jaý» (Бумажный дом / La Casa de Papel) sagasynyň wakasynyň dowam etjekdigini habar berdi, ýöne täze taslama barada giňişleýin maglumat entek ýok.
Bu habar «Berlin» serialynyň 15-nji maýda çykjak ikinji möwsüminiň premýerasynyň öňüsyrasynda mälim edildi. Striming platformasy özüniň sosial torlarynda: «“Bella Ciao” henizem ýaňlanýar. “Kagyz jaýyň” dünýäsi dowam edýär» diýen ýazgyly wideo paýlaşdy.
Kompaniýanyň wekilleri franşizanyň mundan beýläk hem giňeldiljekdigini aýtdy. Netflix bu serialyň ýapylmak gorkusy astynda bolan ispan taslamasyndan başlap, platformanyň iň meşhur iňlis dilinde bolmadyk şoularynyň birine çenli geçen ýoluny ýatlatdy. «Kagyz jaý» halkara «Emmi» baýragyna mynasyp boldy we özüniň garşylyk görkezme temasy arkaly bütindünýä meşhurlygyny gazandy, «Bella Ciao» aýdymy bolsa iň tanalýan aýdymlaryň birine öwrüldi.
Franşizanyň dolanyp gelýändigi barada Professoryň keşbini ýerine ýetiren aktýor Alwaro Morte hem habar berdi.
Ispan metbugatynyň berýän maglumatyna görä, serialy dörediji Aleks Pina we Vancouver Media studiýasy dört bölümden ybarat täze mini-serialyň üstünde işleýär. Taslama polkownik Tamaýo (oýnan Fernando Kaýo) bagyşlanar. Ýöne Netflix tarapyndan bu taslamanyň täze yglan edilen habar bilen arabaglanyşygy heniz resmi taýdan tassyklanmady.
