Netflix platformasy baş keşbi Adam Sendleriň ýerine ýetirmeginde meşhur «Synpdaşlar-3» komediýasyny çykarar. Täze filmiň tutumy barada Hollywood Reporter neşiri habar berdi.
Kinonyň režissýorlygyny ozal «Bagtly Gilmor-2» filmini düşüren Kaýl Nýuwaçek amala aşyrar. Üçünji bölegiň ssenarisini bolsa Adam Sendleriň özi Tim Herlihi bilen bilelikde ýazdy.
Filmiň sýužeti we onda başga haýsy aktýorlaryň oýnajakdygy entek ýaşyryn saklanylýar. Taslamanyň prodýuserleri hökmünde Adam Sendler, onuň aýaly Jeki Sendler, Tim Herlihi we Jek Jarraputo dagy çykyş ederler.
«Synpdaşlar» filminiň ilkinji bölegi 2010-njy ýylda ekrana çykypdy. Onda mekdep ýyllaryndaky basketbol tälimçileri ýogalan we uzak ýyllardan soň gaýtadan duşan bäş sany çagalyk dostuň gyzykly başdan geçirmeleri gürrüň berilýär. Birinji filme Kewin Jeýms, Kris Rok, Dewid Speýd, Rob Şnaýder we Salma Haýek ýaly meşhur ýyldyzlar gatnaşypdy.
Onuň dowamy bolan ikinji film bolsa 2013-nji ýylda tomaşaçylara gowuşdy. Şonda aktýorlar düzümine Endi Semberg, Teýlor Lotner we Patrik Şwarsenegger dagy hem goşulypdy.
Filmiň üçünji böleginiň düşürilip bilinjekdigi baradaky gürrüň 2015-nji ýyldan bäri bardy.
