Ýaponiýada elektrokarlara zarýad bermek üçin oturdylan modully ýol örtüklerini synagdan geçirmäge başladylar. Taslamany ýerli Obayashi gurluşyk kompaniýasy we ulagyň şaý toplumlaryny öndüriji Denso durmuşa geçirýär diýip, Nikkei ýazýar. Taraplar tapgyrlaýyn amala aşyrmagyň taýýar tehnologiýasyny 2025-nji ýyla çenli çykarmagy göz öňünde tutýarlar.
Obayashi ýörite güýçlendirilen betony işläp taýýarlaýar. Ol ulagyň standart ýol agramyna çydamly bolmaly we şol bir wagtda zarýad komponentlerini üstki gatlaga aňrybaş golaý ýerleşdirmäge mümkinçilik bermeli.
Denso katuşkalaryň we beýleki elektriki bölekleriň döredilişine jogap berýär.
Synag geçirijiler ýapyk poligonda ykjam elektromobiliň säginmesiz hereket eder ýaly ýagdaýda bolmagyny gazandylar: ol ähli zerur energiýany gidip barşyna ýüzugra almaga ýetişýärdi. Dogry, hereketiň tizligi bary-ýogy 15 km/sag boldy.
Tizligiň pesligi synag geçirijileri alada goýanok. Birinjiden, ýapyk çäklerde hereket edýän şatllar ýa-da şäher awtobuslary üçin şolam ýeterlik. Ikinjiden, taslamanyň üstünde işleniberse, tizligi artdyrmak başartsa gerek.
Ýöne baha meselesi hem bar. Ýol gatlagyna goşmaça elementleriň girizilmegi ýol gurluşygynyň we ýollaryň soňraky abatlaýyş işleriniň bahasyny ganymat gymmatladar. Ondan hem başga, simsiz zarýadnikleriň özi hem kuwwatly (gymmat) bolmaly, sebäbi onuň üstündäki asfalt gatlagy we beton bölünip çykýan energiýanyň bir bölegini özüne siňdirer.
