Ýer ýüzünde, takmynan, 20 kwadrillion garynja ýaşaýar. “Washington Post” gazetiniň habar bermegine görä, şeýle netijä Gonkong uniwersitetiniň gözlegçiler topary geldi. Muny MIR24 ýetirýär.
Neşiriň bellemegine görä, alymlar garynjalaryň ýaşaýşy barada 489 sany ylmy işi seljerip, bu mör-möjekleriň umumy massasyny 12 megatonna uglerod süýümi bilen deňeşdirip bolýandygyny we munuň ähli guşlary we süýdemdirijileri bilelikde alanyňda-da köpdügini anykladylar. Ýeriň ýüzünde her bir adama, takmynan, 2,5 mln garynja düşýär.
Gözlegiň esasy awtory, Germaniýanyň Wýursburg uniwersitetiniň ylmy işgäri Patrik Şulthaýsyň gürrüň bermegine görä, garynjalary sanamak ýüzýyllygyň dowamynda zähmet çeken “dürli ýurtlardan müňlerçe awtoryň” maglumatlary netijesinde mümkin boldy. Hasaplama iki usul arkaly alnyp baryldy: garynjalar tarapyndan üstünden geçilen ýere gaçan ýapraklaryň nusgalarynyň, şeýle-de mör-möjekler üçin ýörite duzaklaryň kömegi bilen.
Gözleg dünýäniň ähli ýerinde diýen ýaly geçirildi, ýöne Afrikanyň we Aziýanyň birnäçe sebitleri boýunça maglumatlar ýok diýip, neşir belleýär. Garynjalar Antarktidadan we Arktikadan başga ähli yklymlarda we klimat zolaklarynda bar. Olar, esasan, tropiki we subtropiki sebitlerde köpdür.
Gazetiň anyklaşdyrmagyna görä, gözlegçileri gyzyklandyrýan indiki sorag – wagtyň geçmegi bilen garynjalaryň sanynyň üýtgemegidir.
