Özbegistan Respublikasynyň Maýa goýumlar we daşary söwda ministri Jamşid Hodžaýew bilen Türkmenistanyň Ministrler Kabinetiniň Başlygynyň orunbasary Batyr Atdaýewiň Daşkentde bolan duşuşygynyň dowamynda türkmen-özbek gatnaşyklarynyň depginli ösüşi ara alnyp maslahatlaşyldy.
Özbegistan bilen Türkmenistanyň arasyndaky Söwda-ykdysady hyzmatdaşlygy we senagat kooperasiýasyny ösdürmegiň 2022-2025 ýyllar üçin maksatnamasyny durmuşa geçirmegiň, maýa goýumlar ulgamynda hyzmatdaşlygy ösdürmegiň geljegine seredildi.
Şeýle-de duşuşyk mahalynda, geçen ýyl iki ýurduň arasyndaky haryt dolanyşygynyň 67% artyp, 902 mln dollara ýetendigi, üstümizdäki ýylda bolsa alty aýyň içinde bu görkezijiniň ýene 9% — 486 mln dollara çenli ýokarlanandygy bellenildi. Muňa garamazdan, söhbetdeşler özara söwdanyň göwrümini has hem artdyrmagyň — ýakyn geljekde ýylda 2 mlrd dollara ýetirmegiň möhümdigini nygtadylar.
Mundan hem başga, özbek ministri we türkmen wise-premýeri 2022-nji ýylyň ahyryna çenli Söwda-ykdysady, ylmy-tehniki we medeni hyzmatdaşlyk boýunça bilelikdäki özbek-türkmen toparynyň 17-nji mejlisini geçirmegiň mümkinçiliklerini ara alyp maslahatlaşdylar.
Taraplar dokma, derman senagaty, gurluşyk we oba hojalyk pudaklarynda bilelikdäki taslamalaryň sanyny artdyrmak barada ylalaşdylar, şeýle hem ýeňil ulaglary we oba hojalyk tehnikalaryny bilelikde öndürmeklige, Türkmenistanda durmuş maksatly tehnikalary bilelikde çykarmagy guramaklyga, iki ýurduň çägi boýunça ýükleriň geçişini we deňiz duralgalaryny hem ulanmak arkaly, halkara ulag geçelgeleri boýunça daşaýyşlary guramaklygy stimulirlemeklige gyzyklanma bildirdiler.
