Prezident Serdar Berdimuhamedowyň adyna pakistan tarapyndan hat gelip gowuşdy. Onda Türkmenistanyň tebigy betbagtçylyk zerarly Pakistan Yslam Respublikasynyň halkyna iberen ynsanperwerlik kömegi we goldawy üçin tüýs ýürekden hoşallyk beýan edilýär.
Hatda iki halkyň arasyndaky gatnaşyklaryň köpasyrlyk taryhy-medeni kökleriniň bardygy bellenilýär. Türkmen tarapynyň kömegi şu kyn döwürde uly ähmiýete eýedir.
Ýeri gelende bellesek, Prezident Serdar Berdimuhamedowyň Buýrugyna laýyklykda, Pakistan Yslam Respublikasynda soňky wagtlarda bolýan köp sanly adam pidalaryna we uly möçberli weýrançylyklara getirýän tebigy betbagtçylyklar bilen baglylykda, dostlukly pakistan halkyna ynsanperwerlik kömegini bermek maksady bilen, degişli derman we lukmançylyk serişdeleri, azyk we beýleki harytlar ynsanperwerlik kömegi hökmünde pakistan tarapyna ýetirildi. 5-nji sentýabrda ynsanperwerlik ýüki bilen «Ил-76» kysymly ýük daşaýan türkmen uçary Pakistan Yslam Respublikasynyň Sind welaýatynyň Karaçi şäheriniň howa menziline gondy.
