2022-nji ýylyň ilkinji ýedi aýynda Kamboja 740 müňden gowrak daşary ýurtly syýahatçyny kabul etdi, bu bolsa geçen ýylyň degişli döwri bilen deňeşdirilende 560 göterim köpdür. Bu barada ýurduň Syýahatçylyk ministrliginiň metbugat relizinde aýdylýar diýip, russian.news.cn habar berýär.
Syýahatçylyk ministri Thong Khon ähli sosial-ykdysady işleriň dikeldilmeginiň paýtagt Pnompeniň, Siýemreap medeni welaýatynyň we Sianukwil kenarýaka welaýatynyň käbir esasy syýahatçylyk ýerlerine syýahatçylaryň sanynyň artmagyna ýardam edendigini aýtdy.
Şu ýylyň ýanwar – iýul aýlarynda goňşy Wýetnam patyşalyga gelen syýahatçylaryň sany boýunça lider boldy, onuň yzyndan Tailand we Hytaý gelýär.
Kamboja 2022-nji ýylda azyndan 1 mln daşary ýurtly syýahatçyny kabul etmekçi bolýar, bu bolsa 2021-nji ýyla garanyňda ep-esli köpdür. Şol ýyl ýurda 200 müň adam gelipdi diýmek bilen, T.Khon 2023-nji ýylda bu görkezijiniň 2 milliona ýetjekdigini, 2026-njy we 2027-nji ýyllarda bolsa koronawirus pandemiýasyndan öňki derejesine geljekdigini belledi.
Ministrligiň maglumatlaryna görä, 2019-njy ýylda patyşalyk 6,6 mln syýahatçyny kabul etdi, bu hem 4,92 mlrd ABŞ dollary möçberinde girdeji getirdi.
Kamboja patyşalygy ÝUNESKO-nyň Bütindünýä mirasynyň sanawyna girýän üç ýadygärligi, has takygy, Siýemreap welaýatyndaky Angkor-Wat arheologiki seýilgähi, Preahwihea ybadathanasy we Kampongthom welaýatyndaky Sambor-Preý-Kuk arheologiki toplumy bilen meşhurdyr.
