Şu ýylyň 8-9-njy sentýabrynda Özbegistanyň Daşkent şäherinde Parlamentara birleşigiň düzümine girýän döwletleriň zenan parlament ýolbaşçylarynyň 14-nji sammiti geçiriler. Oňa Parlamentara birleşigiň düzümine girýän döwletleriň, şol sanda Türkmenistanyň zenan parlament ýolbaşçylary, deputatlardyr halkara guramalaryň wekilleri gatnaşarlar.
“Dunyo” agentliginiň habar bermegine görä, bu iri forumy geçirmek hakyndaky ylalaşyk Wenada geçirilen 13-nji sammitiň çäklerinde gazanyldy. Özbegistanda guraljak nobatdaky sammit tutuş Merkezi Aziýa sebitinde ilkinji gezek geçirilip, ol “Parlamentiň öňdebaryjy orny: durnuklylygy we abadançylygy netijeli üpjün etmek üçin töwekgelçiliklere baha bermek” mowzugyna bagyşlanar. Sammitiň esasy maksady durnuklylygy we gülläp ösüşi netijeli üpjün etmek, gender deňligini hem-de zenanlaryň hukuklaryny, mümkinçiliklerini artdyrmagy gazanmak boýunça parlamentler üçin ileri tutulýan ugurlarydyr hereketleri kesgitlemekden ybaratdyr.
Sammitiň jemleri boýunça Daşkent jarnamasyny kabul etmek meýilleşdirilýär.
