Ýaponiýanyň Toyota Motor öndürijisi bZ4X elektrokarlaryny eýelerinden satyn alar diýip, Electrek kompaniýanyň hatyna salgylanyp habar berýär. Muny incrussia.ru ýetirýär.
Iýun aýynyň ahyrynda Toyota pes hilli teker boltlary sebäpli awtomobilleriň yzyna gaýtarylýandygyny habar berdi. Elektrokarlaryň tekerleri kemçilikler sebäpli hereket wagtynda gaçyp biler. Yzyna gaýtarma 2,7 müň awtomobile täsir etdi.
Toyota bZ4X-iň eýelerine ruluň başyna geçmezligi we awtomobili golaýdaky diler merkezine abatlaýyş üçin tabşyrmagy maslahat berýär. Şeýle wagt müşderilere mugt çalyşma hödürlenýär.
Indi Toyota müşderiler üçin mümkinçilikleriň sanawyny hem giňeltdi. Olara 5 müň dollar möçberinde bonus tölener, giňeldilen kepillik berler we müşderiler 2024-nji ýylyň ahyryna çenli EVgo stansiýalarynda mugt zarýad alyp bilerler (şol wagta çenli müşderilere awtomobiller yzyna gaýtarylyp berilse). Eger hiç bir wariant müşderiniň göwnünden turmasa, Toyota bZ4X-i azyndan 42 müň dollara yzyna satyn alar.
“The Verge” neşirine beren teswirinde kompaniýanyň wekili ahyrky bahanyň awtomobiliň ýagdaýyna görä kesgitlenjekdigini belledi.
