Twitter Inc kompaniýasy girdejiniň azalmagy sebäpli 2022-nji ýylyň ikinji çärýeginde arassa ýitgini hasaba aldy. Ol munuň sebäbini Ilon Mask bilen şertnama gatnaşygynda näbelliligiň netijeleri bilen düşündirýär diýip, interfax.ru habar berýär.
Kompaniýanyň metbugat relizinde bellenilişi ýaly, aprel – iýun aýlarynda onuň girdejisi 1%, geçen ýylyň degişli döwründäki 1,19 mlrd dollardan 1,18 mlrd dollara çenli azaldy. FactSet tarapyndan sorag edilen hünärmenler girdejiniň ortaça 1,32 mlrd dollara çenli ýokarlanmagyna garaşypdylar.
“Görkezijiniň pese gaçmagy makroykdysady ýagdaý bilen baglanyşykly mahabat gurşawyndaky kynçylyklar, şeýle-de Mask tarapyndan Twitter-i satyn almakdaky näbellilik bilen şertlendirilýär” – diýip, metbugat relizinde bellenilýär.
Kompaniýanyň mahabatdan gazanan girdejisi ikinji çärýekde 2% ýokarlanyp, 1,08 mlrd dollara ýetdi.
Aprel – iýun aýlarynda “monetizasiýa edilen gündelik işjeň ulanyjylaryň” sany geçen ýylyň degişli döwri bilen deňeşdirilende 16,6% artyp, 237,8 mln adama ýetdi. ABŞ-da şeýle ulanyjylaryň sany 14,7% - 41,5 milliona, galan ýerlerde 17% - 196,3 milliona çenli artdy.
Aprel – iýun aýlarynda Twitter-iň arassa ýitgisi bir ýyl ozalky 66 mln dollar ýa-da paýnama üçin 0,08 dollar arassa girdeji bilen deňeşdirilende, 270 mln dollar ýa-da paýnama üçin 0,35 dollar boldy. Kompaniýanyň Mask bilen gatnaşygy netijesinde çeken çykdajylary, umumy alanyňda, 33 mln dollar boldy.
