Bloomberg agentliginiň habar bermegine görä, San-Fransiskonyň oturdaşlar kazyýeti telekeçi Ilon Masky Twitteri satyn almazdan öň maýadarlary ýalňyşdyrmakda günäkär saýdy we munuň üçin öwez tölegini tölemek barada höküm çykardy.
Agentligiň maglumatlarynda belleýşi ýaly, 2022-nji ýylda Mask sosial torda galp hasaplaryň diýseň köpdügini bahanalap, söwdadan dänip biljekdigini mälim edipdi. Oturdaşlar telekeçiniň şol beýanaty kompaniýanyň bazar bahasyna gönümel täsir etdi diýen netijä geldiler.
Kazyýet öz kararyny Maskyň ýokardaky aýyplama bilen geçiren bäş aýynyň dowamynda sosial toruň aksiýalaryna ýeten maddy zyýanyň bahasyny çykaryp, onsoň yglan etdi. Öwez töleginiň mukdary entek aýdylanok.
Ilon Mask 2022-nji ýylda Twitteri 44 milliard dollara satyn aldy we derrew onuň adyny X diýip üýtgetdi. Söwda amala aşyrylmanka, ol toruň moderasiýa düzgünlerini-de berk ýazgardy.
Onuň şol tankytlarynyň arasynda 2021-nji ýylyň ýanwarynda Waşingtondaky wakalaryň täsiri bilen ABŞ-nyň prezidenti Donald Trampyň hasabynyň petiklenmesi-de bardy. Mask şonda platformany satyn alandan soň, mazmuna düýbünden başgaça gözegçilik ediljekdigini-de aýdypdy.
