Ýewropa Bileleşiginde täze ýeňil awtoulaglaryň satuwy iýun aýynda ýyllyk aňlatmasynda 15,4% azaldy. Bu barada Ýewropanyň awtoöndürijiler assosiasiýasynyň (ACEA) beýanynda aýdylýar diýip, TASS habar berýär.
“2022-nji ýylyň iýun aýynda hasaba alnan täze awtoulaglaryň görkezijisi pese gaçmagyny dowam etdirip, 15,4%-e ýetdi” – diýip, gurama belleýär. Bu aýda, takmynan, 886 müň ýeňil awtoulag satyldy, bu bolsa 1996-njy ýyldan bäri hasaba alnan iň pes iýun görkezijisidir diýip, assosiasiýa nygtaýar.
Awtoulaglaryň satuwynyň azalmagy ÝB-niň ähli öňdebaryjy bazarlarynda hasaba alynýar. Ýeňil ulag serişdeleriniň satuwy ýyllyk aňlatmasynda iýun aýynda GFR-de 18,1%, Italiýada 15%, Fransiýada 14,2% we Ispaniýada 7,8% azaldy.
2022-nji ýylyň birinji ýarymynda bileleşigiň ýurtlarynda 4,6 mln töweregi awtomobil satyldy, bu bolsa geçen ýylyň degişli döwri bilen deňeşdirilende 14% azdyr. Bu döwürde satuwyň azalmagy Italiýada 22,7%, Fransiýada 16,3%, Germaniýada 11% we Ispaniýada 10,7% boldy.
Hünärmenler ÝB-de awtoulaglaryň satuwynyň azalmagynyň esasy sebäbi hökmünde olaryň önümçiligi üçin zerur bolan bölekleriň üpjünçiligi bilen bagly bökdençligi belleýärler.
