Adybir sosial tora eýelik edýän Twitter kompaniýasynyň paýnamalarynyň bahasy anna güni 15,57%, ýagny 38,06 dollara çenli arzanlady. Muňa NASDAQ biržasynyň maglumatlary şaýatlyk edýär diýip, TASS habar berýär.
Owal Twitteri satyn almak kararyna gelen telekeçi Ilon Mask Twitterde galp akkauntlaryň sany (umumy sanyň 5%-den azragy) baradaky maglumatlaryň tassyklanylmagyna garaşýandygy bilen bagly, kompaniýany satyn almak boýunça geleşikleriň durmuşa geçirilmeginiň togtadylandygyny habar berdi.
Maskyň beýleki kompaniýasy bolan Teslanyň paýnamalary bolsa, tersine 5,73%, ýagny 769,78 dollara çenli ýokarlady. Penşenbe gününiň söwdalaşyklarynyň ahyrynda maýa goýumçylaryň Ilon Maskyň ünsüniň öz täze aktiwlerine gönügäýmeginiň mümkindiginden howatyrlanmaklarynyň täsiri bilen her aýratyn kagyzyň bahasy pese düşmäge başlady.
25-nji aprelde Twitteriň ýolbaşçylygy Maskyň kompaniýany 44 mlrd dollara satyn aljakdygyny mälim edipdi. ABŞ-yň Gymmatly kagyzlar we biržalar boýunça komissiýasynyň maglumatlaryna görä, eger milliarder ylalaşygy ýatyrmak kararyna geläýse, onda ol munuň üçin kompaniýa 1 mlrd dollar möçberinde jerime tölemeli bolar.
Eger ylalaşygy ýatyrmak başlangyjy Twitterden çyksa, onda öweztölegi Mask alar. Geleşigiň gutarnykly ýapylmaly senesi 2022-nji ýylyň 24-nji oktýabry diýip bellendi.
