Türkiýäniň prezidentiniň diwanynyň ýanyndaky Milli kitaphananyň gaznasy 2020-nji ýylda esaslandyrylan gününden bäri Türkmenistana we başga-da dünýäniň 55 ýurduna Türkiýäniň taryhy, medeniýeti we edebiýaty baradaky kitaplary ugratdy. Bu barada "Anadolu" agentligi habar berýär. Kitaphananyň müdiri Aýhan Tuglunyň sözlerine görä, Türkiýäniň bu iri kitaphanasynyň kitaplary 2017-nji ýylda jemlenilip ugrapdyr.
"Diňe "Jihan-Numa" okyjy zalynyň özünde 200 müňden gowrak kitap saklanýar. Soňky ýyllaryň içinde bize dünýäniň 108 ýurdundan 10 müňden gowrak neşir gelip gowuşdy" diýip, Tuglu gürrüň berýär.
Häzirki güne çenli kitaphananyň özem dünýäniň 56 ýurduna kitaplaryny ugratdy.
Onuň sözlerine görä, häzir kitaphananyň gaznasynda dünýäniň 140 dilinde çykan kitaplar saklanýar eken.
"Biz daşary ýurtly kärdeşlerimizden, esasan, şol ýurtlaryň taryhyna, medeniýetine we edebiýatyna degişli kitaplary ýollamagy haýyş edýäris. Şol bir wagtda özümizem Türkiýäniň taryhyna medeniýetine we edebiýatyna degişli neşirleri olar bilen paýlaşýarys" - diýip, ol sözüniň arasynda belledi.
