16-njy aprelde Daşary işler ministrliginiň binasynda Türkmenistanyň Adam hukuklary babatda halkara borçnamalarynyň we halkara ynsanperwer hukugynyň ýerine ýetirilmegini üpjün etmek boýunça Pudagara toparyň nobatdaky mejlisi geçirildi. Onda toparyň başlygy, daşary işler ministri Raşid Meredow adam hukuklary babatda halkara borçnamalaryň we halkara ynsanperwer hukugynyň berjaý edilmeginiň üpjünçiligi babatda Türkmenistan Hökümeti tarapyndan amala aşyrylýan derwaýys çäreler barada giňişleýin gürrüň berdi.
Mejlisiň barşynda Pudagara toparyň 2021-nji ýylda ýerine ýetiren işleriniň netijeleri barada hasabat diňlenildi we geljek döwür üçin işleriň ileri tutulýan ugurlary kesgitlenildi. Toparyň 2022-nji ýyl üçin Iş meýilnamasyna seredildi we onuň geljekde durmuşa ornaşdyrylmagynyň zerur meseleleri ara alnyp maslahatlaşyldy. Mundan başga-da, mejlise gatnaşyjylar ýurduň döwlet edaralarynyň hem-de jemgyýetçilik guramalarynyň halkara hyzmatdaşlar bilen özara hereketleriniň ileri tutulýan ugurlary babatda pikir alyşdylar.
