Argentinanyň hökümeti koronawirus pandemiýasy sebäpli girizilen, jemgyýetçilik ýerlerinde iki metr aralygy saklamak talabyny ýatyrdy. Saglygy goraýyş ministrliginiň şu karary anna güni "Argentina Respublikasynyň resmi maglumatynda" çap edildi.
"Köpçülik ýerlerinde 2 metr aralygy saklamak kadasyny ýatyrmaly" - diýip, resminamada aýdylýar. Şeýle-de bolsa, pudak ýapyk binalarda örtük dakynmagy dowam etmegi maslahat berýär.
Saglygy goraýyş ministrliginiň düşündirişine görä, ýurtda ilatyň 80%-niň koronawirusa garşy doly sanjym almagy we "soňky dokuz hepdäniň dowamynda kesel ýokuşanlaryň sanynyň üzül-kesil azalmagy" çäklendirme çärelerini biraz gowşatmaga mümkinçilik beripdir. La Nacion gazetiniň habar bermegine görä, ýakyn günlerde Argentinanyň hökümeti ýurda gelmek üçin ähli çäklendirmeleriň ýatyrylýandygyny yglan eder. Häzirki wagtda respublika gelmäge diňe koronawirusa garşy doly waksina alan daşary ýurt raýatlaryna rugsat berýärler. Çäklendirmeler ýatyrylandan soň, olara sowalnamany doldurmak we medisina ätiýaçlandyrmasyny görkezmek ýeterlik bolar.
Pandemiýanyň başyndan bäri Argentinada kesellänleriň sany 9 mln bolup, keselden ýogalanlaryň sany 128 müň adama ýetdi.
