Amerikaly alymlar Ebola gyzdyrmasyny bejermegiň täze usulyny ilkinji gezek üstünlikli synagdan geçirdi. Science Advances (SciAdv) žurnalynyň maglumatlaryna görä, Tehas uniwersitetiniň ylmy gözlegçilerine kesel ýokuşan primatlary “Obeldesiwir” atly peroral (ýuwutmak arkaly kabul edilýän) dermanyň kömegi bilen bejermek başartdy.
Ebola gyzdyrmasy kesel degenleriň biologiki suwuklyklary arkaly ýokuşýan ölüm howply wirus keselidir. Kesel içki gan akmalara getirip, organlara zeper ýetirýär we köplenç, ölüme eltýär. Bar bolan sanjymlar we wena goýberilýän derman serişdeleri ulanylyşda kyn bolup, diýseň gymmat düşýär.
“Obeldesiwir” dermany “Remdesiwir” derman serişdesiniň peroral görnüşidir. Gyzykly ýeri, ilkibaşda ol COVID-19 bilen göreşmek üçin işlenip taýýarlandy. Derman wirusyň köpelmegi üçin zerur bolan fermenti blokirleýär. Bu hem Ebolanyň dürli ştammlaryna garşy göreşde netijeli boldy.
Makaka-rezuslardaky tejribeler 100% diri galyjylygy görkezdi, ýawa makakalarynda bu görkeziji 80%-e ýetdi. Derman diňe bir wirusy ýok etmän, eýsem organlaryň zeperlenmeginiň öňüni aldy.
Alnan netijeler, aýratynam, derman serişdelerine elýeterliligi çäkli bolan sebitlerde Ebolany bejermegiň amatly usulyny döretmäge umytlandyrýar.
