Tesla we SpaceX kompaniýalarynyň ýolbaşçysy bolan amerikaly telekeçi Ilon Mask “Hurun” (Hytaýda Forbes ýaly neşir) neşiriniň wersiýasyna görä, dünýäniň iň baý adamlarynyň sanawynda birinjiligi saklady. Bu barada neşiriň saýtynda ýerleşdirilen hasabatda aýdylýar diýip, TASS habar berýär.
Şeýlelikde, Maskyň baýlygy bir ýylda 8 mlrd dollar artyp, 205 mlrd dollara ýetdi. Sanawyň liderleriniň üçlüginde ikinji orny eýelän Amazon kompaniýasynyň esaslandyryjysy we ýolbaşçysy Jeff Bezos we LVMH (Louis Vuitton Moet Hennessy) kompaniýalar toparynyň prezidenti Bernar Arno hem bar. Olaryň baýlygy, degişlilikde, 188 mlrd dollar we 153 mlrd dollar bilen bahalandyrylýar. Şol bir wagtyň özünde, Jeff Bezosyň baýlygy 1 mlrd dollar azaldy, Bernar Arnonyň baýlygy bolsa 39 mlrd dollar artdy.
2022-nji ýylda sanawyň liderleriniň onlugyndan hytaýly milliarder, Nongfu brendi bilen agyz suwuny öndürijiniň eýesi Çžun Şanşan çykdy, ol 2021-nji ýylda onluga ilkinji gezek goşulypdy. Şu ýylyň reýtinginde ol sekiz orun aşak düşdi we 71,7 mlrd dollar baýlygy bilen 15-nji orunda ýerleşdi. Bu milliarder Hytaýyň iň baý adamy bolmagynda galýar.
Koronawirus keseliniň ýaýrandygyna we dünýä ykdysadyýetindäki beýleki meselelere garamazdan, soňky bir ýylda dünýäde 153 sany täze dollar milliarderi peýda boldy. Neşiriň maglumatlaryna görä, häzirki wagtda olaryň sany 3381-e ýetýär.
Baý adamlaryň sany boýunça Hytaý birinji orunda – 1133 sany dollar milliarderi, ikini orunda ABŞ – 716. Liderleriň üçlügini 215 milliarder bilen Hindistan jemleýär.
Soňky ýylda milliarderler üçin esasy girdeji çeşmesi saglygy goraýyş, gozgalmaýan emläk, ownuk söwda we maliýe hyzmatlary ýaly ugurlar boldy.
