Nýu-Ýorkuň akdyrylýan hapa suwlarynda Missuri uniwersitetiniň hünärmenleriniň ýolbaşçylygyndaky alymlar SARS-CoV-2-niň öň näbelli bolan azyndan dört sany görnüşini tapdylar. Olar bu barada maglumatlary “Nature Communications” žurnalyndaky makalada ýerleşdirdiler diýip, Gazeta.ru habar berýär.
Nýu-Ýorkdaky hapa suwlaryň nusgasy 2020-nji ýylyň tomsundan bäri alynýardy. Gözlegçiler 2021-nji ýyldaky nusgalarda belli bolan görnüşlere häsiýetli bolmadyk mutasiýalar bilen wirus görnüşlerini tapdylar. Ähli mutasiýa wirus genomynyň şol bir ýerine degişlidi.
“Biz henizem omikron görnüşiniň nireden gelendigini bilemzok, ýöne ol bir ýerden gelen bolmaly. Täze görnüşler hemme ýerde döreýär, olaryň arasynda ahyrynda umumy populýasiýa girip, weýrançylyk döreden omikron hem bar. Biz bu üýtgeşik mutasiýa geçiren nusgalar adamlar üçin howply täze görnüşiň döremegine esas bolup biler diýip pikir edýäris” – diýip, gözlegçiler belledi.
Adamlarda tapylan görnüşler ýüze çykarylmady. Gözlegçileriň pikiriçe, bu ýagdaýda gürrüň haýwanlaryň, ähtimal, Nýu-Ýorkuň kanalizasiýa ulgamynda ýaşaýan alakalaryň arasynda wirusyň ýaýramagy netijesinde ýüze çykan mutasiýalar barada gidýär. SARS-CoV-2 haýwanlardan adamlara geçdi, indi bolsa ters proses bolup geçdi – wirusyň “adam” görnüşleri haýwanlaryň arasynda ýaýrady we olaryň organizminde ewolýusiýany geçirdi. Olaryň adam üçin näderejede ýokuşagan bolup biljekdigi heniz belli däl.
