5-nji fewralda Pekinde geçirilen ýokary derejeli türkmen-hytaý gepleşikleriniň barşynda Türkmenistan-Hytaý gaz geçirijisiniň 4-nji şahasynyň gurluşygynyň taslamasyny durmuşa geçirmek boýunça geljekde bilelikde ýerine ýetiriljek işleriň çäklerinde tebigy gaza bolan baha meselelerini ara alyp maslahatlaşmaga girişmegiň zerurdygy nygtaldy.
"Bu meseleler boýunça alnyp baryljak bilelikdäki işleriň dowamynda türkmen we hytaý kärdeşleriniň harytlyk turbageçirijiniň üstünden geçýän gazyň bahasy babatda dünýä tejribesinden ugur aljakdyklaryna bil baglaýaryn" diýip, Prezident Gurbanguly Berdimuhamedow gepleşikleriň dowamynda aýtdy. Bellenilişi ýaly, ikitaraplaýyn ylalaşyklary ýerine ýetirmekde türkmen tarapy Hytaý Halk Respublikasynyň kompaniýasynyň “Galkynyş” gaz käniniň 2-nji tapgyryny Hytaý tarapynyň maýa goýum serişdesiniň hasabyna işläp taýýarlamagyna gatnaşmak hakyndaky meselelere seredip biler. Şunda hytaý tarapynyň gönükdiren maýa serişdeleri ugradylýan türkmen gazynyň hasabyna yzyna gaýtarylar.
Şeýlelikde, gepleşikleriň barşynda taraplar Türkmenistan-Hytaý gaz geçirijisiniň 4-nji şahasynyň gurluşygynyň taslamasy boýunça ylalaşyk gazandylar hem-de Hyzmatdaşlyk boýunça türkmen-hytaý we hytaý-türkmen komitetlerine bu ugurda bilelikdäki degişli işleri geçirmegi tabşyrdylar.
