25-nji ýanwarda Türkmenistanyň Ermenistan Respublikasyndaky Adatdan daşary we Doly ygtyýarly ilçisi M.Aýazow W.Brýusow adyndaky Ýerewan döwlet uniwersitetiniň adam hukuklary, demokratiýa we syýasy ylymlar boýunça ÝUNESKO kafedrasynyň müdiri, professor Tigran Torosýan bilen duşuşdy. Taraplar ÝUNESKO kafedrasynyň işi bilen bagly meseleleri ara alyp maslahatlaşdylar.
Diplomat duşuşykda Türkmenistanyň Prezidenti Gurbanguly Berdimuhamedowyň türkmen halkynyň milli medeni mirasyny gorap saklamak we wagyz etmek bilen bagly meselä aýratyn ähmiýet berýändigini nygtap, döwlet Baştutanynyň teklibi esasynda türkmenleriň maddy we ruhy gymmatlyklarynyň birnäçesini ÝUNESKO-nyň sanawyna goşmak boýunça durmuşa geçirilýän işler barada gürrüň berdi.
Soňra professor T.Torosýan Merw, Köneürgenç, Nusaý ýaly ÝUNESKO-nyň Bütindünýä mirasynyň sanawyna girizilen taryhy-medeni ýadygärliklerden söz açýan wideoşekilleri synlady. Şolaryň hatarynda ÝUNESKO-nyň Adamzadyň maddy däl medeni mirasynyň görnükli nusgalarynyň sanawyndan orun alan «Görogly» dessançylyk sungaty, «Küştdepdi» aýdym we tans dessury, türkmen milli halyçylyk sungaty hem bar. Şunuň bilen baglylykda, ilçi bu sanawa geçen ýylyň dekabrynda «Dutar ýasamak senetçiligi, dutarda saz çalmak we bagşyçylyk sungaty» atly milli hödürnamanyň goşulandygyny hem habar berdi.
