2021-nji ýylda Türkiýede polat önümçiliginiň möçberi 2020-nji ýyl bilen deňeşdirilende 12,7 göterim – 40 mln tonna çenli ýokarlandy. Türkiýäniň Polat öndürijileriniň assosiasiýasynyň (TÇÜD) habaryna görä, bu respublikanyň taryhynda çig polat önümçiliginiň rekord görkezijisidir. Bu barada Anadolu agentligi habar berýär.
Dünýä söwdasyndaky proteksionizm çäreleri, çig malyň we energiýanyň ýetmezçiligi, şeýle-de uglerod zyňyndylaryny azaltmak maksadyna ýetmek üçin çäreleriň çäginde önümçilik çäklendirmeleri sebäpli bazardaky näbellilige garamazdan, Türkiýäniň polat senagaty ýyly üstünlikli görkezijiler bilen tamamlady.
Koronawirus pandemiýasy sebäpli azalan Türkiýäniň polat önümçiligi bazarlaryň bölekleýin dikeldilmegi bilen ýokarlanyp başlady. Geçen ýylyň aprel we maý aýlarynda Türkiýäniň polat önümçiliginiň ýokary ösüş depginleri 2020-nji ýylyň degişli döwründe ep-esli ýitgiler bilen baglanyşyklydy.
Geçen ýylyň ikinji ýarymyndan önümçilik, sarp ediş we daşarky söwda kem-kemden durnuklaşdy. Umuman, 2021-nji ýylda polat önümçiligi geçen ýyl bilen deňeşdirilende 12,7 göterim ýokarlanyp, 40,4 mln tonna möçberinde rekord derejä ýetdi.
