Türkmenistanyň Belarus Respublikasyndaky ilçihanasy tarapyndan ýurdumyzda 2022-nji ýylyň «Halkyň Arkadagly zamanasy» diýlip atlandyrylmagyna bagyşlanan maslahat geçirildi. Ilçihananyň binasynda guralan çärä Belarus döwlet uniwersitetinde, Belarus döwlet lukmançylyk uniwersitetinde, M.Tank adyndaky Belarus döwlet mugallymçylyk uniwersitetinde hem-de Belarus döwlet ykdysadyýet uniwersitetinde bilim alýan türkmen talyplary gatnaşdylar. Bu barada turkmenistan.ru saýty habar berýär.
Maslahatyň dowamynda Türkmenistanyň Belarus Respublikasyndaky Adatdan daşary we Doly ygtyýarly ilçisi N.Şagulyýew çykyş edip, Garaşsyzlyk ýyllarynda ýurdumyzda ýetilen sepgitler, ykdysadyýetiň ähli ulgamlarynda gazanylan üstünlikler barada giňişleýin gürrüň berdi. Türkmenistanyň syýasy, ykdysady hem-de medeni durmuşyndan söz açýan wideoşekiller bolsa aýdylanlaryň üstüni ýetirdi.
Türkmen amaly-haşam sungatyna degişli bolan el halylarynyň, zergärçilik önümleriniňdir milli lybaslaryň, ýurdumyzyň durmuşyndaky möhüm wakalary beýan edýän fotosuratlaryň sergisi bu ýere ýygnananlarda aýratyn täsir galdyrdy.
