Owganystanyň Içeri işler ministrligi Türkmenistan — Owganystan — Pakistan — Hindistan gaz geçirijisiniň gurluşygyny tamamlamak üçin howpsuzlyk bilen bagly hiç bir zyýanyň ýokdugyny mälim etdi. Muňa garamazdan, gatnaşyjy ýurtlary arkaýynlaşdyrmak üçin ýöriteleşdirilen bölümçe dörediler. Bu barada ministrligiň maglumatyna salgylanyp, TOLOnews habar berýär.
Owganystanyň Içeri işler ministrliginiň wekili Said Hostiniň sözlerine görä, häzirki wagtda bölümçäni meýilleşdirmek we döretmek boýunça işler alnyp barylýar. Şunlukda, aýry-aýry etraplarda TOPH gaz geçirijisiniň howpsuzlygyny üpjün etmek maksady bilen, 30 müň harby gullukçydan ybarat bolan bölümçäni döretmek göz öňünde tutulýar. Ýurduň degişli ministrlikleri we edaralary türkmen tarapyny taslamanyň howpsuzlygyny üpjün etjekdiklerine ynandyrdylar.
Owgan tarapynyň wekilleriniň bellemegine görä, howpsuzlygyň üpjün edilmezligi Türkmenistan — Owganystan — Pakistan — Hindistan gaz geçirijisiniň gurluşygynyň saklanylmagynyň esasy sebäbi bolup durýar. Owgan halky bu taslamanyň täze iş orunlaryny döredip, ýurduň ykdysadyýetine goldaw berjekdigine ynam bildirýärler.
