5-nji ýanwarda Prezident Gurbanguly Berdimuhamedow Lebap welaýatyna amala aşyran iş saparynyň jemlerine bagyşlap iş maslahatyny geçirdi. Oňa nebitgaz toplumyna gözegçilik edýän Ministrler Kabinetiniň Başlygynyň orunbasary Ş.Abdrahmanow, nebitgaz toplumynyň ýolbaşçylary hem-de ýurdumyzda iş alyp barýan Hytaýyň Milli nebitgaz korporasiýasynyň wekilleri gatnaşdylar.
Iş maslahatynda ýurdumyzyň nebitgaz toplumynda amala aşyrylýan işler barada hasabatlar berildi. Türkmen Lideri iş maslahatyna gatnaşyjylara ýüzlenip, ýurdumyzyň uglewodorod serişdelelerini diwersifikasiýa ýoly bilen dünýä bazaryna çykarmak babatda sanlyja ýylda dünýä ähmiýetli möhüm taslamalaryň birnäçesiniň amala aşyrylandygyny belledi. Şol iri taslamalaryň biriniň hem “Malaý” gaz gysyjy desgasydygyny bellän döwlet Baştutany türkmen tebigy gazyny uzynlygy 188 kilometr bolan Malaý-Bagtyýarlyk turba geçirijisi arkaly “Asyryň iri taslamasy” diýlip atlandyrylan Türkmenistan-Hytaý transmilli gaz geçirijisine bermekde möhüm ähmiýetli bu desganyň laýyk 1 ýyl mundan ozal açylyp ulanmaga berlendigini belledi.
Döwlet Baştutany Lebap welaýatyndaky “Malaý” ýatagyndan tebigy gazyň 1986-njy ýyldan bäri alynýandygyny belläp, başlangyç gory 358 milliard 700 million kub metr bolan bu känden häzirki döwre çenli 247 milliard kub metrden köp tebigy gazyň çykarylandygyny nygtady. Türkmen Lideri häzirki wagtda gaz çykarmagy dowam etmegiň, onuň çägini giňeltmek, şeýle hem özleşdirilýän gatlaklardan aşaky gatlaklardan gaz gorlaryny ýüze çykarmagyň möhüm wezipeleriň biri bolup durýandygyny mälim etdi.
Ýeri gelende bellesek, “Malaý” käninde bir ýyl mundan ozal, ýyllyk kuwwatlylygy 30 milliard kub metre barabar bolan gaz gysyjy desga ulanmaga berlipdi. “Malaý” gaz ýatagy Garagumuň günortasynda, Lebap welaýatynyň edara ediş merkezi Türkmenabat şäherinden, takmynan, 70 kilometrlikde ýerleşýär.
