Türkmenistanyň tebigy gazynyň Eýranyň üsti bilen Azerbaýjana iberilmegi göz öňünde tutulan tebigy gaz (swop) şertnamasy güýje girizildi. Eýranyň iri habarlar gulluklarynyň maglumat bermegine görä, bu şertnama 2022-nji ýylyň 1-nji ýanwaryndan güýje girdi.
Mälim bolşy ýaly, geçen ýylyň 28-nji noýabrynda Aşgabatda geçirilen Ykdysady Hyzmatdaşlyk Guramasynyň 15-nji sammitiniň çäklerinde gol çekilen üçtaraplaýyn “swop” şertnamasy 1-nji ýanwarda hereket edip başlady. Gazanylan ylalaşyga görä, Eýran her ýyl 1,5-dan 2 milliard kub metre çenli Türkmenistanyň tebigy gazyny Azerbaýjana geçirer.
Şertnama gol çekilen güni Eýranyň nebit ministri Jawad Owji bu gazanylan ylalaşygyň energetika hyzmatdaşlygynda möhüm bolup durýandygyny belläp, şertnamanyň gyş aýlarynda Horasan-Rezawi, Demirgazyk we Günorta Gülüstan we Semnan welaýatlarynyň ýangyç üpjünçiligini durnuklaşdyrmaga kömek etjekdigini belläpdi.
