Ýaponiýanyň hökümeti pes girdejili ýurtlara koronawirus pandemiýasyna garşy göreşde kömek bermek üçin Bütindünýä bankynyň düzümindäki gurama bolan Halkara Ösüş Assosiasiýasyna 376,7 mlrd iýena ($3,4 mlrd) iberer. Bu barada Ýaponiýanyň Maliýe ministrliginiň saýtynda habar berilýär diýip, TASS belleýär.
“Dünýä COVID-19 sebäpli görlüp-eşidilmedik çökgünlik bilen ýüzbe-ýüz bolmagy dowam etdirýär. Biz garyplygy ýok etmek ýolunda gazananlarymyzy ýitirip bileris. Koronawirusyň täze ştammlarynyň sanynyň artmagy esasynda biz ýokanjyň güýçlenmeginiň öňüni almak üçin, şol sanda ösüp barýan ýurtlara-da sanjymlary we dermanlary çalt ibermeli” – diýlip, Ýaponiýanyň Maliýe ministri Sýuniti Sudzukiniň ýüzlenmesinde aýdylýar. Ýaponiýa tarapyndan bu pul mukdarynyň häzire çenli iň ulusy boljakdygy bellenilýär.
Mundan öň hem Ýaponiýa halkara COVAX platformasy arkaly beýleki döwletlere birnäçe gezek kömek etdi. Bu çäreleriň çäginde koronawirusa garşy, takmynan, 25 mln sanjym dozasy Indoneziýa, Wýetnam, Malaýziýa we Tailand ýaly birnäçe ýurtlara iberildi. Ýaponiýa ýene 10 mln dozany Afrika ýurtlaryna bermegi wada berdi.
