Ýaponiýanyň iň uly awtomobil korporasiýasy Toyota Motor 2030-njy ýyla çenli 30 sany elektromobil modelini hödürlemegi meýilleşdirýär. Bu barada awtokonserniň prezidenti Akio Toýoda metbugat konferensiýasynyň dowamynda aýtdy diýip, TASS habar berýär.
“Biz 2030-njy ýyla çenli 30 sany elektromobil modelini hödürlemegi meýilleşdirýäris. Mundan başga-da, biz 2030-njy ýyla çenli elektromobilleriň satuwyny 3,5 mln birlige ýetirmegi göz öňünde tutýarys” – diýip, Toýoda aýtdy. Şeýle-de, prezident “Toyota-nyň 2035-nji ýyla çenli öz kärhanalarynda uglerod bitaraplygyny gazanmakçydygyny” belledi. Awtokonsern elektromobilller üçin batareýalaryň önümçiligine maýa goýumlary hem 1,5 trln iýenadan 2 trln iýena çenli (13,2 mlrd dollardan 17,6 mlrd dollara çenli) artdyrar diýip, Toýoda aýtdy.
Awtokonserniň ilkinji elektromobili bolan Toyota bZ4X krossoweriniň Ýaponiýa, Demirgazyk Amerika, Hytaý we Ýewropa ýaly dünýäniň birnäçe sebitlerinde 2022-nji ýylyň ortalarynda satylyp başlanmagyna garaşylýar. Häzirki wagtda awtokonserniň model hatarynda elektromobil ýok. Kompaniýa birnäçe gibridleri we wodorod bilen işleýän Mirai awtomobilini hödürleýär, ýöne bu modele isleg diýseň az.
