Kembrij uniwersitetiniň alymlar topary howany arassalaýjy enjam döretdi. Geçirilen synaglar täze ulgamyň otaglary wirusdan 99,9% netijelilik bilen arassalaýandygyny görkezdi. Bu barada ferra.ru habar berdi.
Enjam döredilende alymlar sorujy häsiýetleri bilen belli bolan uglerod nanoturbalaryny ulandylar. Mundan başga-da, täze süzgüç ulgamy poliester içlikler bilen enjamlaşdyryldy, olar diňe bir könelmeýänligi bilen däl, eýsem, ýokary temperaturalara çydamlylygy bilen hem tapawutlanýar. Olaryň ýylylyga garşy durnuklylygy aýratyn möhüm orun eýeleýär, sebäbi enjamda birnäçe sekundyň içinde 80 gradusa çenli gyzdyryp bilýän we şeýlelik bilen onuň ýüzüni dezinfeksiýa edip bilýän elektrik geçiriji membranalardan edilen süzgüçler bar.
Synaglardan soň alymlar täze süzgüç ulgamynyň howany beta-koronawirus ýaly dürli wiruslardan arassalaýandygyny anykladylar. Koronawirusyň bu görnüşi haýwanlarda bolýar we gurluşy boýunça COVID-19-a meňzeýär. Şeýle hem, enjam adamyň dem alyş ulgamyna täsir edip, pnewmoniýa ýa-da traheobronhit döredýän adenowiruslara garşy üstünlikli göreşýär.
